DROGA

Now playing : Ugoy ng duyan

Gay beauty contest na nadaanan ko sa basketball court malapit sa amin. Talent portion. Napadaan ako may hawak akong ensaymada at putok na binili sa bakery. Napatitig ako sa isang baklang nakasuot ng pantulog, nakaupo at may hawak na laruang manika habang inaantok.

Tumutunog na ang background music - ugoy ng duyan. Umaarte siya na inaantok. Unti unti siyang pumipikit, sumasandal sa upuan nang nakapikit, humihigahiga sa upuan at tuluyan nang bumaba sa upuan at nahiga sa sahig.

Tahimik na pinapanood siya nang mga manonood. Walang imik dala na siguro ng pagkamangha sa talentong ipinapakita ng bakla. Napatigil din ako at pinanood muna ang ginagawa niya.

Maya maya pa'y. . .

Mga bente segundo siyang tulog sa sahig habang tumutunog ang ugoy ng duyan. Bumangon siya at umuugoy ugoy ang ulo. . . antok antok pa din. Mga dalawang minuto siya sa ganoong pusisyon. Umiingay na ang mga manonood, kung sa talentadong pinoy siya sumali eh nasaraduhan na siya ng kurtina.

Natahimik na naman ang manonood nang lumapit siya sa mikropono at nag wikang "Iwasan natin ang droga, nakasasama ito" sabay nag bow siya sa mga manonood.