ANG SARAP

Sabi niya sa akin kanina "Open it wider. Come on, open your mouth wider." Binuka ko pa ang bibig ko, hindi talaga magkasya, masyado yatang malaki, hindi magkasya yung aparato na ginagamit niya sa pag pasta sa ngipin ko, umiilaw ilaw pa iyon eh. Inaamin ko, hindi talaga ako sumusunod sa sinasabi ng mga dentist na dapat daw eh binibisita mo sila every 3-6 months para naalagaan ang ipin, kanina nagpa-pasta ako dahil sa kailangan ko siya sa medical requirement para sa u.s visa ko (naks). Dalawang taon na ang nakaraan nang huli akong magpunta sa kanya.

Sa tuwing nakakakita ako at tuwing papalapit na ako sa dentist chair. Kakaiba na ang nararamdaman ko, parang gusto ko na lang mamatay muna at sumailalim sa general anesthesia para pag gising ko eh tapos na ang dapat nilang gawin sa ngipin ko. Medyo hindi kase maganda ang impression ko sa mga dentista, parang tuwang tuwa sila sa tuwing nangingilo ang mga pasyente.

Ang unang karanasan ko sa pag papasta ng ngipin ay noong grade 6 ako. Sabi ng erpat ko hindi daw masakit, malamig daw sa ipin pag nililinisan at pinapastahan. Wala akong kakaba-kaba ng mga panahong iyon, pangiti ngiti pa ako sa tomboy kong dentista na ngayon ay sumakabilang buhay na, sumalangit nawa. Naupo na ako sa dentist chair at nag umpisa na siyang magtrabaho sa ipin ko, bandang kalagitnaan na, kung ano anong pangyayari na ang nangyari sa buhay oral cavity ko. Sa sobrang sakit akala ko sa silya elektrika na ako umupo at ilang oras na lang tatagal ang buhay ko. May ipinasok siyang parang pang hangin sa ipin, pota@!#* ayoko na talaga!!!! napapamura talaga ako sa sobrang sarap pagkangilo. Well minumura ko lang yung dentista sa isip ko, ang dami kaseng nakapasak sa bibig ko.

Pagkatapos ng malagim na pangyayaring iyon. . . . na trauma na ako. Ayoko na makakita ng dentista at lalong ayoko na umupo sa silya elektrika este dentist chair. Pero nahubog na rin ako ng panahon, ilang beses na ako pinastahan simula ng una kong ekspiryens, kanina swabeng swabe ang pag pasta sa akin. Konting ngilo lang then poof kokokrans! Tapos na agad. Ready na ako sa medical exam bukas. Yehey!